भूमि आयोग कञ्चनपुरले पुर्णता पायो

सार्थक ब्यूरो । भूमि सम्बन्धी समस्या समाधान गर्नका लागि गठित भूमि आयोग कञ्चनपुरले पुर्णता पाएको छ । बिहीवार तीन जना सदस्यहरुले पदभार ग्रहण गरेका हुन् ।
यस सङ्गै आयोगले पुर्णता पाएको भूमि आयोग कञ्चनपुरका अध्यक्ष नेत्र प्रसाद पन्तले जानकारी दिए । यस अघि माघ १४ गते अध्यक्ष पन्तले पदभार ग्रहण गरेका थिए ।
बिहिवार कञ्चनपुर स्थित आयोगको विज्ञ सदस्यमा दिल बहादुर सिजाली, सदस्यमा दिल बहादुर देउवा र महिला सदस्यमा कमला चौधरीले पदभार ग्रहण गरेका हुन् ।
यस्तै, आयोगको सदस्यहरुमा जिल्ला प्रशासन कार्यालय , मालपोत कार्यालय , डिभिजन वन कार्यालय , नापी कार्यालय र जिल्ला समन्वय कार्यालयका एक÷एक जना रहने छन् ।
बिहिवार आयोजित पदभार कार्यक्रमका प्रमुख अतिथि जिल्ला समन्वय समितका प्रमुख दुर्गा दत्त बोहराले यस आयोगलाई अन्तिम आयोग बन्न शुभकामना व्यक्त गरे ।
लामो अपेक्षापछि आयोगले पुर्णता पाएको भन्दै उनले जिल्ला स्थित भुमि सम्बन्धि समस्या समाधान हुनेमा विश्वास व्यक्त गरे । भुमि आयोग कंचनपुरका अध्यक्ष पन्तले समितिले पुर्णता पाए संगै कर्मचारी माग गरिएकाले लगत्तै कार्य अगाडी बढाइने बताए ।
केन्द्रिय आयोगले केही दिन भित्रै सर्वेक्षक र अमिनहरु छनौट गरेर पठाउने उनले बताए । उनले भने,–’समितिले अब पुर्णता पाएको छ, कर्मचारी माग गरेका छौँ लगत्तै तीब्र रुपमा काम अगाडी बढाउछौ ।
जिल्लामा हाल सम्म भुमिहिनहरुका ७२ हजार ९ सय ३० निवेदन परेका छन् । यस अघिका आयोगहरुले वडा, नगरपालिका क्षेत्रमा कामहरु गरेकाले त्यसको अध्ययन गरेर छुटेकाहरुलाई अझै समावेस गरिने अध्यक्ष पन्तले बताए ।
यस आयोगलाई अन्तिम आयोगका रुपमा काम गर्ने उनले प्रतिबद्धता जनाए । पदभार कार्यक्रममा बोल्दै सदस्यहरुले यस आयोगलाई नै अन्तिम आयोग बनाउन पुर्णरुपले लाग्ने प्रतिबद्धता जनाए ।