विपक्षी दलको बैठक बस्दै

सार्थक ब्यूरो ।संसद्‌मा जारी गतिरोध हटाउने विषयमा छलफल गर्न आज बिहीबार विपक्षी दलको बैठक बस्दै छ। अहिले केही बेरमा बस्ने बैठकमा प्रमुख प्रतिपक्षी दल नेकपा माओवादी केन्द्रलगायत विपक्षी दल सहभागी हुनेछन्। बैठकमा सदनको गतिरोध फुकाउने विषयमा छलफल हुने एक नेताले जानकारी दिए। साथै बैठक भिजिट भिसा प्रकरणमा अख्तियार दुरुपयोग अनुसन्धा आयोगले गरिरहेको छानबिनमा गृहमन्त्री रमेश लेखकले कसरी सहयोग पुर्‍याउँछन् भन्ने विषयमा पनि कुरा हुने बताइएको छ। भिजिट भिसा प्रकरणमा नाम जोडिएका गृहमन्त्री लेखककै राजीनामा माग्दै विपक्षी दलले केही दिनदेखि संसद् बैठक सञ्चालन हुन दिएका छैनन्।
सदन खुलाउन सभामुख देवराज घिमिरेले पनि प्रयास गरिरहेका छन्। यस क्रममा उनले विपक्षी दलहरूसँग पटकपटक छलफल गरे पनि सहमत गराउन सकेका छैनन्। विपक्षी दल गृहमन्त्रीले राजीनामा दिनैपर्ने अडानमा छन्। उता सत्तापक्ष भने गृहमन्त्रीले संसद्‌मा बोल्न पाउनुपर्ने र राजीनामा दिनुपर्ने कारण नभएको जिकिर गरिरहेको छ। यसअघि बिहीबार बिहान बसेको माओवादी पदाधिकारी बैठकले संसद् सञ्चालनका लागि अधिकतम पहल गर्ने निर्णय गरेको थियो। विपक्षी सांसदहरूले गृहमन्त्री रमेश लेखकको राजीनामाको माग गर्दै संसद् अवरुद्ध गरिरहेका छन्। उनीहरू भिजिट भिसा प्रकरणमा गृहमन्त्रीको भूमिका विवादास्पद रहेको भन्दै सदन चल्न नदिई आन्दोलित छन्।