सार्थक ब्युरो।कृष्णपुर नगरपालिका–६ स्थित सिंहपुर सामुदायिक वनमा पर्यटकीय गतिविधि बढाउने उद्देश्यसहित पाहुना घर निर्माणको काम अन्तिम चरणमा पुगेको छ। नगरपालिकाले रु. ३ लाख र सामुदायिक वनले रु. ७ लाखभन्दा बढी खर्च गरी स्थानीय शैलीमा पाँच कोठे पाहुना घर तयार पारिँदैछ।
वनका अध्यक्ष जोगराज चौधरीका अनुसार प्रत्येक कोठामा दुई शय्यासहित आवश्यक पूर्वाधार जडान गरिँदैछ र करिब दुई महिनाभित्र निर्माण सम्पन्न गर्ने लक्ष्य लिइएको छ। घर सञ्चालनमा आएपछि सामुदायिक वन अवलोकनका लागि आउने पाहुनालाई न्यून शुल्कमा बासको सुविधा दिने र उनीहरूको रोजाइअनुसार थारु, राना थारु र पहाडी समुदायका अर्गानिक परिकार पस्किने योजना छ।
पाहुनाको मागअनुसार थारु समुदायको परम्परागत संस्कृति, रहनसहन, भेषभूषा, नृत्य तथा सांस्कृतिक प्रस्तुति देखाइने र अर्गानिक खाना उपलब्ध गराइने तयारी गरिएको छ। साथै, वनभित्रको भ्यू टावर, पिकनिक स्थल, सालको पुनःउत्पादन प्लट, डुङ्गा सयरको पोखरीजस्ता आकर्षण पनि पाहुनाले अनुभव गर्न सक्नेछन्।
सिंहपुरको पुरानो थारु बस्तीका १० घरमा होमस्टे सञ्चालन गर्ने योजना पनि अघि बढाइएको छ। यस वर्षमै होमस्टे दर्ता गरी औपचारिक रूपमा सञ्चालन गर्ने तयारी भइरहेको वनका अध्यक्ष चौधरीले जानकारी दिए।
वडाध्यक्ष बाबुराम चौधरीका अनुसार सामुदायिक वनलाई पर्यटनसँग जोडेर स्थानीयको आयआर्जन बढाउने उद्देश्यसहित सुरु गरिएको यो परियोजना छिट्टै सम्पन्न हुनेछ र वडा कार्यालयबाट आवश्यक सहयोग निरन्तर दिइनेछ।-रासस








Discussion about this post