सार्थक ब्युरो। जिल्लामा महिलाहरू आफैं अग्रसर भई छाउगोठ भत्काउने अभियान चलाइरहेका छन्। जिल्ला प्रशासन कार्यालयले नौ वटै पालिकामा छाउगोठ हटाउन आग्रह गरेपछि यहाँका महिलाहरू सक्रिय बनेका हुन्।
वेदकोट नगरपालिका–१०, चतहरीकी करिब ५५ वर्षीया कलाशा चुनारले लामो समयदेखि रजस्वला हुँदा छुट्टै छाउगोठमा बस्दै आएकी थिइन्। तर अब उनले यस कुप्रथालाई अन्त्य गर्ने संकल्प गर्दै आफ्नो छाउगोठ भत्काइदिएकी छन्। “महिनावारी त महिलामा हुने प्राकृतिक प्रक्रिया हो, यसका लागि छुट्टै गोठ बनाउनुपर्ने कुरा गलत रहेछ भन्ने बुझेपछि अब गोठमा बस्ने कुरा नै छैन,” उनले भनिन्।
उनकी छिमेकी मिस्रा चुनारले समेत बर्सौंदेखि चल्दै आएको अन्धविश्वासलाई अन्त्य गर्ने निर्णय लिएका छन्। “अभियान सुरु भएपछि चेत खुलेको छ, अब छोरी–बुहारीलाई पनि छाउगोठमा बस्न दिने छैनौं,” उनले बताए।
यसैबीच, बिहीबार चतहरीमा वडा कार्यालयको आयोजना र स्विट नेपालको सहकार्यमा अन्तर्क्रिया तथा सचेतना कार्यक्रम गरिएको थियो। कार्यक्रममा सहभागी महिलाहरूले छाउगोठलाई मनैदेखि हटाउनुपर्नेमा जोड दिए।
वेदकोट नगरपालिकाकी उपप्रमुख तुलसी जोशीले छाउगोठलाई देवी–देवता खुसी पार्ने साधन मान्ने धारणाले महिलालाई यातना दिइएको उल्लेख गर्दै अब यो कुप्रथा अन्त्य गर्न सबै एकजुट हुनुपर्ने बताइन्। वडा नं. १० का अध्यक्ष रतनसिंह विष्टले दलित र जनजाति बस्ती चतहरीलाई छाउपडी अन्त्य अभियानको नमूना क्षेत्र बनाउनुपर्ने धारणा राखे।
स्थानীয় प्रहरी प्रशासनको उपस्थितिमा महिलाले आफ्नै हातले छाउगोठ भत्काएपछि त्यहीँ अन्तर्क्रिया कार्यक्रम पनि सम्पन्न गरिएको थियो। जिल्ला प्रहरी प्रमुख खड्कबहादुर खत्रीले छाउगोठमा बस्ने प्रथा कानुनले समेत निषेध गरेको स्मरण गराउँदै, “रजस्वलाका बेला अमानवीय व्यवहार गर्ने व्यक्तिलाई तीन महिना कैद सजायसम्मको व्यवस्था छ,” भने।
प्रमुख जिल्ला अधिकारी लक्ष्मण ढकालले पश्चिम क्षेत्रमा अझै देखिँदै आएको छाउपडी कुरीतिलाई निवारण गर्नु आजको आवश्यकता भएको बताए। “मानिस सबल र शिक्षित हुँदै गएपछि यस्ता कुप्रथालाई त्याग्न सकिन्छ। अब यो अभियानलाई सबैले समर्थन गर्नुपर्छ,” उनले जोड दिए।
कञ्चनपुरका दुर्गम बस्तीमै महिलाहरूले आफैं पहल गर्दै छाउगोठ भत्काउने काम थालेपछि यो अभियानले छाउपडी कुरीतिलाई अन्त्य गर्न महत्वपूर्ण मोड लिएको देखिएको छ।








Discussion about this post