सार्थक ब्यूरो ।जेनजी आन्दोलनको केही दिनअघि मात्रै प्रहरी जवान उत्तम थापाले घर फर्किन अझ चार दिन मात्र बाँकी भएको भन्दै टिकटकमा भावुक भिडियो राखेका थिए। गीतसँगै राखिएको भिडिओमा उनी श्रीमतीसँगका तस्बिर देखिँथ्यो। घर जाने उत्साह, मनमा उमङ्ग—तर त्यो सपना अब कहिल्यै पूरा हुने छैन।दार्चुला जिल्लाको लेकम गाउँपालिका–३ गुमाखोलीका २९ वर्षीय उत्तम थापा जेनजी आन्दोलनकै क्रममा निर्घात कुटपिटबाट ज्यान गुमाएका छन्। आन्दोलनकारीहरूले उनलाई “डीएसपी हुन्, गोली चलाउन आदेश दिएका” भन्दै भीडबीच कुटपिट गरेका थिए। घटनाको भिडिओ अहिले सामाजिक सञ्जालहरूमा भाइरल बनेको छ। पछि उनी प्रहरी जवान मात्रै भएको खुल्दा निर्दोषलाई मारिएको भन्दै आन्दोलनकारीहरूको तीव्र आलोचना भइरहेको छ।उत्तमको मृत्युको खबरले परिवारलाई शोकमा डुबाएको छ। श्रीमती सुस्मिता निरन्तर रुँदै बसेकी छन्।
घरका जेठा सन्तान रहेका उत्तम ९ वर्षदेखि प्रहरी सेवामा थिए।सात महिनाअघि उनका भाइ घाँस दाउरा गर्न जाँदै गर्दा भिरबाट खसेर निधन भएको थियो।बुबा पनि झण्डै आठ वर्षअघि सुगर रोगका कारण बितिसकेका छन्।अब आमा र श्रीमती दुवै पूर्ण रूपमा बेसहारा बनेका छन्। वडाध्यक्ष सुरेश थापाका अनुसार, “उत्तमको मृत्युले आमा र श्रीमतीको जीवन नै अन्धकार भएको छ। पहिले श्रीमान, त्यसपछि दुई छोरा गुमाउँदा आमाको अवस्था निकै दयनीय बनेको छ।”
उत्तम र सुस्मिताको विवाह छ–सात वर्षअघि भएको थियो। उनीहरूका सन्तान भने थिएनन्।परिवारको मुख्य आश्रय उत्तम नै थिए।उनीहरूको गाउँमा कच्ची घर छ र जग्गा जमिन पनि खासै छैन।रोजगारी वा आम्दानीका अन्य स्रोत नभएकाले परिवार जीविको पार्जनमै कठिनाइमा थियो।उत्तम पहिले धनगढीमा खटिएका थिए भने चार–पाँच महिनाअघि मात्रै काठमाडौँ सरुवा भएका थिए। काठमाडौँमै रहेका उनका एकजना भाइले शव बुझेर पशुपतिनाथमा दाहसंस्कार गरिसकेका छन्।
वडाध्यक्ष थापा भन्छन्, “अब परिवारको सबै आधार ढलेको छ। भाउजु पूर्ण रूपमा एक्लिएकी छन्। आर्थिक रूपमा कमजोर यो परिवारलाई राज्यले तत्काल राहत र दीर्घकालीन सहयोगको व्यवस्था गर्नैपर्छ।”
यो घटनाले एक निर्दोष प्रहरी जवानको जीवन मात्र होइन, एक आमाको छोरामा टेकेको जीवन र एक श्रीमतीको भविष्य पनि सँगै चकनाचुर पारेको छ।उत्तम फर्कन सकेनन्, तर अब राज्यले उनका आमा र श्रीमतीलाई अँध्यारोमा छाड्नु हुँदैन — यही हो यो दुःखद घटनाबाट उठेको सबैभन्दा गहिरो सन्देश।








Discussion about this post