वडा अध्यक्षसँगको विवादपछि पत्रकार कुँवर महासङ्घको सदस्यताबाट निलम्बित

सार्थक ब्यूरो । कञ्चनपुरमा वडा अध्यक्षमाथि दुर्व्यवहार गरेको आरोप लागेपछि पत्रकार एश्वर्य कुँवरलाई नेपाल पत्रकार महासङ्घ कञ्चनपुर शाखाले सदस्य पदबाट निलम्बन गरेको छ।
महासङ्घले सोमबार जारी गरेको विज्ञप्तिमा असार ७ गते भीमदत्त नगरपालिका–१८ का वडा अध्यक्ष रविन्द्रप्रसाद देवकोटासँग होटल स्वीट ड्रिममा भएको भनिएको घटनालाई गम्भीर रूपमा लिएको उल्लेख गरेको छ। उक्त घटनामा पत्रकार कुँवरको संलग्नता देखिएको भन्दै प्रारम्भिक कारबाहीस्वरूप उनलाई शाखा सदस्य पदबाट निलम्बन गरिएको जनाइएको छ।
महासङ्घका अनुसार सार्वजनिक स्थानमा पत्रकारिताको आचारसंहिता र पेशागत मर्यादा विपरीत गतिविधि गरेको आरोपमा नेपाल पत्रकार महासङ्घको विधान, २०६० (पाँचौं संशोधन २०७५) अनुसार स्पष्टीकरण माग्ने र सदस्यता निलम्बन गर्ने निर्णय गरिएको हो।
घटनासम्बन्धी छानबिन जारी रहेको महासङ्घले जनाएको छ। यसक्रममा प्राप्त भिडियो सामग्रीमा वडा अध्यक्ष देवकोटाले पत्रकार कुँवरमाथि फिरौती माग्ने तथा रकम असुली गर्ने जस्ता गम्भीर आरोप लगाएको देखिएकाले ती आरोप पुष्टि हुने प्रमाण तथा आधार उपलब्ध गराउनसमेत आग्रह गरिएको छ।
महासङ्घ कञ्चनपुर शाखाका सचिव कुन्दन पाण्डेयद्वारा हस्ताक्षरित विज्ञप्तिमा पछिल्ला दिनहरूमा पत्रकारिताको आचारसंहिता विपरीतका गतिविधि सार्वजनिक भइरहेकाप्रति चिन्ता व्यक्त गरिएको छ। साथै जिल्लाभरका सञ्चारकर्मीलाई पेशागत अनुशासन र पत्रकार आचारसंहिताको पूर्ण पालना गर्न आग्रह गरिएको छ।
महासङ्घले घटनाको विस्तृत अनुसन्धानपछि आवश्यकताअनुसार थप निर्णय लिइने पनि जनाएको छ।