रास्वपाको नीलो दोसल्लाप्रति कांग्रेसको आपत्ती, सदनबाट निष्कासन गर्न माग

सार्थक ब्यूरो ।राष्ट्रिय स्वतन्त्र पार्टीका सांसदहरुले लगाएको नीलो दोसल्लाप्रति नेपाली कांग्रेसले आपत्ती जनाएको छ ।प्रमुख सचेतक श्याम घिमिरेले रास्वपा सांसदहरुलाई बैठक हलबाट निष्कासन गर्न सभामुख देवराज घिमिरेको ध्यानाकर्षण गराएका हुन् ।
भिजिट भिसा प्रकरणमा गृहमन्त्रीको राजीनामा र उच्चस्तरीय छानविनको माग गर्दै आएका रास्वपा सांसदहरु आजको प्रतिनिधिसभा बैठकमा नीलो दोसल्लासहित उपस्थित भएका थिए । ‘नीलो रिबन’लाई मानव तस्करीविरुद्धको अभियानको प्रतिक मानिने उनीहरुको बुझाई छ । तर कांग्रेस सचेतक घिमिरेले भने ‘यो मर्यादित पोशाकभित्र पर्छ कि पर्दैन ?’ भन्दै संसद नियमावलीको बुँदा नम्बर ३० र ३१ औंल्याएका हुन् ।
‘संसद सचिवालयको नियमावली ३० को बैठकमा अभद्र व्यवहार गर्ने आफ्नो व्यवहार नियन्त्रण गर्न सभामुखले चेतावनी दिन सक्नेछन्, चेतावनी पाएपछि त्यस्तो सदस्यले आफ्नो व्यवहारमाथि तुरुन्तै नियन्त्रण गर्नुपर्नेछ भन्ने व्यवस्था गरिएको छ’, उनले भने, ‘साथै बैठक कक्षबाट निष्कासन समेत गर्न सकिने व्यवस्था नियमको ३१ अनुसार छ, यो संसदमा मर्यादित पोशाकमा आउनुपर्छ भनिएको छ ।’
सचेतक घिमिरेले आज दोसल्ला लगाउनेले भोलि हाफ पाइन्ट लगाएर संसद आउनसक्ने पनि बताए । ‘भोलि कोही हाफ पाइन्ट मात्रै लगाएर आउने, जथाभावी ड्रेस लगाएर आउने हो भने त्यसलाई संसदको मर्यादाभित्र राख्ने कि नराख्ने ? यस्तो किसिमको व्यवहार गर्ने माननीय सदस्यलाई सभामुखले चेतावनी र संसद्‌बाट निष्कासन गर्ने कारबाही पनि आवश्यक छ भन्ने म ध्यानाकर्षण गर्न चाहन्छु’, उनले थपे ।