सार्थक ब्युरो। सत्तारूढ दल नेपाली कांग्रेस र नेकपा (एमाले) दार्चुलाले लिपुलेक–कालापानी हुँदै भारत र चीनबीच भएको भनिएको व्यापार सम्झौताप्रति गम्भीर ध्यानाकर्षण भएको भन्दै अलग–अलग विज्ञप्ति जारी गर्दै कडा आपत्ति जनाएका छन्।
नेपाली भूमि प्रयोग गरेर व्यापारमार्ग सञ्चालन गर्ने गतिविधि सार्वभौमिकता र स्वाभिमानमाथिको स्पष्ट आघात भएको दुवै दलको आरोप छ।एमाले दार्चुला जिल्ला कमिटीको भदौ ७ र ८ गते बसेको बैठकले यस घटनाप्रति गम्भीर ध्यानाकर्षण गराउँदै सरकारलाई ठोस कदम चाल्न आग्रह गरेको छ। पार्टी अध्यक्ष ज्ञानेन्द्र घर्तीले जारी गरेको विज्ञप्तिमा भनिएको छ – “नेपाली भूमिमा कुनै पनि प्रकारको व्यापार वा गतिविधि अस्वीकार्य छ। यो नेपालको सार्वभौम अधिकारमाथिको हस्तक्षेप हो।”
यस्तै, नेपाली कांग्रेस जिल्ला कार्यसमितिको भदौ ६ र ७ गतेको बैठकले पनि आपत्ति जनाउँदै, सभापति ललितसिंह बोहोराले हस्ताक्षर गरेको विज्ञप्ति सार्वजनिक गरेको छ। विज्ञप्तिमा भनिएको छ – “कालापानी, लिपुलेक, लिम्पियाधुरा क्षेत्र नेपालको नक्साभित्र पर्ने भूभाग हो। तर, त्यही बाटो हुँदै भारत–चीनबीच नेपाललाई उपेक्षा गर्दै व्यापारमार्ग सञ्चालन गर्ने निर्णय अस्वीकार्य छ।”
कांग्रेसले यस घटनालाई नेपालको सार्वभौमसत्तामाथिको उपेक्षा ठहर गर्दै सरकारलाई तत्काल प्रभावकारी कूटनीतिक पहल गर्न आग्रह गरेको छ।
त्यसैगरी, एमालेले समेत नेपाल–भारत–चीन त्रिपक्षीय सम्बन्धमै यसले नकारात्मक असर पार्ने चेतावनी दिंदै सरकारलाई नेपालको भू–अधिकारको संरक्षणका लागि ठोस कदम चाल्न माग गरेको छ। साथै, राष्ट्रिय स्वाभिमानको रक्षा गर्न नेपाली जनता, नागरिक समाज, बुद्धिजीवी, युवा र विद्यार्थीलाई एकजुट हुन आह्वान गरेको छ।
कालापानी–लिपुलेकको भू–राजनीतिक संवेदनशीलतामध्ये यस्तो घटनाले नेपालभित्र राष्ट्रियता र सार्वभौमिकताको प्रश्न फेरि तीव्र रूपमा उठाएको छ।








Discussion about this post