भारतमा जीएसटी कटौतीपछि एकै दिन ५१ हजारभन्दा बढी सवारी साधन बिक्री

सार्थक ब्यूरो ।भारतमा सेप्टेम्बर २२ देखि लागू भएको नयाँ वस्तु तथा सेवा कर (जीएसटी) दरको प्रभाव अटोमोबाइल क्षेत्रमा तत्काल देखिन थालेको छ। कर कटौतीसँगै कारको मूल्य चार वर्षअघिको स्तरमा झरेपछि प्रमुख कम्पनीहरूले रेकर्ड बिक्री गरेका छन्।
भारतीय सञ्चारमाध्यमका अनुसार, नवरात्रको पहिलो दिन मात्र मारुती, हुन्डाई र टाटा मोटर्सले ५१ हजारभन्दा बढी कार बिक्री गरेका छन्। साथै, कर कटौतीसँगै कम्पनीहरूले १० प्रतिशतभन्दा बढी उत्सव छुट घोषणा गरेपछि उपभोक्ता झन् आकर्षित भएका छन्।
मारुतीको ३० वर्षको रेकर्ड भंग
सेप्टेम्बर २२ मा मात्र मारुतीले करिब ३० हजार कार बिक्री गरेको छ। कम्पनीले दिएको जानकारीअनुसार, यो पछिल्लो तीन दशकको सबैभन्दा ठूलो दैनिक बिक्री हो। विशेषगरी साना कार सस्तो भएपछि मध्यमवर्गीय परिवारहरू बढी संख्यामा शोरूम पुगेका थिए।
हुन्डाईको पाँच वर्षको उच्चतम बिक्री
सोही दिन हुन्डाईले झण्डै ११ हजार कार बिक्री गरेको छ, जुन गत पाँच वर्षमा दैनिक आधारमा सबैभन्दा बढी हो। ग्रान्ड आई१० निओस र क्रेटा मोडेलमा माग बढी रहेको कम्पनीले जनाएको छ।
टाटाको पहिलो १० हजार प्लस डेलिभरी
टाटा मोटर्सले पनि पहिलोपटक एकै दिन १० हजारभन्दा बढी कार ग्राहकलाई उपलब्ध गराएको छ। नेक्सन र पन्च एसयूभी मोडेलहरू सबैभन्दा बढी रोजाइमा परेका छन्। कम्पनीका प्रवक्ताले चाडपर्वको मौसममा यो सुरुवात मात्र भएको र बिक्री अझ बढ्ने विश्वास व्यक्त गरेका छन्।
छुटको स्तरमा उल्लेख्य वृद्धि
जाटो डाइनामिक्सको अध्ययनअनुसार, गत अगस्टमा औसत छुट ९.३ प्रतिशतले बढेर ४५ हजार ३९१ भारतीय रुपैयाँ पुगेको छ, जुन गत वर्षको तुलनामा करिब १० प्रतिशत बढी हो। विशेषगरी ह्याचब्याकमा छुट १०२ प्रतिशतले बढेको छ, जसले तीव्र प्रतिस्पर्धा झल्काउँछ। तर, सेडान, एसयूभी र एमपीभी खण्डमा भने प्रोत्साहन घटेको देखिन्छ।
उच्च छुटका चार कारण
विश्लेषकहरूका अनुसार अटो कम्पनीहरूले उच्च छुट दिन चार प्रमुख कारण छन्— नवरात्र चाडपर्वको सुरुवात भएकाले शुभ दिनमा कार किन्ने परम्परा। यो वर्ष जनवरी–जुनसम्म बिक्री दर केवल १.४% मात्र बढेकाले बजारमा दबाब। अगस्टसम्म कम्पनीहरूसँग ५६ दिनको स्टक रहनु, जुन सामान्यतया २१ दिन हुनुपर्ने मानकभन्दा धेरै। पेट्रोल सवारीमा छुट १४% बढाइएको तर डिजेल सवारीमा भने छुट घटाइएको।नयाँ कर दर र चाडपर्वको मौसमसँगै भारतीय अटोमोबाइल बजारमा यस वर्ष अभूतपूर्व उत्साह देखिएको छ, जसले आगामी महिनामा बिक्री अझ बढ्ने अनुमानलाई थप बल दिएको छ।