जनतासँगको सम्बन्ध बलियो भए वाम आन्दोलनको भविष्य सुरक्षित रहने शंकर पोखरेलको भनाइ

सार्थक व्युरो ।नेकपा (एमाले) का महासचिव शंकर पोखरेल ले नेपाली वामपन्थी आन्दोलनको भविष्य कुनै एक निर्वाचनको परिणामले मात्रै तय नहुने बताएका छन्। भारतको केरला राज्यमा वामपन्थी शक्तिले भोगेको पछिल्लो चुनावी पराजयलाई लिएर नेपालमा विभिन्न टिप्पणी भइरहेका बेला उनले त्यसलाई बढाइचढाइ गरेर व्याख्या गरिएको बताएका हुन्।
सामाजिक सञ्जालमार्फत आफ्नो धारणा सार्वजनिक गर्दै महासचिव पोखरेलले वाम आन्दोलनको दीर्घकालीन भविष्य जनतासँगको सम्बन्ध, राष्ट्रिय हितको पक्षमा गरिने काम र समयअनुकूल राजनीतिक एजेन्डाले निर्धारण गर्ने उल्लेख गरेका छन्। उनका अनुसार अहिले देखिएको चुनौती केवल वाम शक्तिको मात्र नभई लोकतान्त्रिक शक्तिहरूकै साझा चुनौती हो।
पोखरेलले केरला राज्यको राजनीतिक अभ्यासमा प्रायः हरेक निर्वाचनमा सत्ता परिवर्तन हुँदै आएको उल्लेख गर्दै त्यहाँको चुनावी परिणामलाई नेपालको राजनीतिक अवस्थासँग प्रत्यक्ष तुलना गर्नु उपयुक्त नहुने धारणा व्यक्त गरेका छन्। उनले अघिल्लो निर्वाचनमा अपवादका रूपमा वाम गठबन्धन पुनः सत्तामा फर्किएको स्मरण गर्दै लोकतान्त्रिक प्रणालीमा जनमत परिवर्तन स्वाभाविक प्रक्रिया भएको बताएका छन्।
उनले अहिलेको मुख्य आवश्यकता पराजयका कारणको खोजी गर्दै गम्भीर समीक्षा गर्नु र लोकतान्त्रिक शक्तिहरूलाई पुनर्गठन गर्ने स्पष्ट रणनीति तय गर्नु रहेको बताएका छन्। लोकतन्त्रलाई सुदृढ बनाउन राजनीतिक दलहरूले जनविश्वास पुनः स्थापित गर्नुपर्नेमा पनि उनले जोड दिएका छन्।
महासचिव पोखरेलले चुनौतीपूर्ण अवस्थामा निराश हुने वा पलायनको मानसिकता अपनाउनु उचित नहुने उल्लेख गर्दै क्रान्तिकारी शक्तिले प्रतिकूल अवस्थालाई अवसरमा बदल्न सक्नुपर्ने बताएका छन्। उनले राजनीतिक आन्दोलनमा धैर्यता, आत्मसमीक्षा र पुनर्जागरणको आवश्यकता औंल्याएका छन्।
नेपालमा पछिल्लो समय वामपन्थी दलभित्रको विभाजन, घट्दो जनसमर्थन र फेरिँदो राजनीतिक समीकरणबारे बहस भइरहेका बेला पोखरेलको यो अभिव्यक्तिलाई राजनीतिक वृत्तमा अर्थपूर्ण रूपमा हेरिएको छ।