सार्थक ब्यूरो । नेपाली कांग्रेस संस्थापन इतर समूहले आगामी साउन २९ देखि ३१ गतेसम्म काठमाडौंमा आयोजना गर्न लागेको राष्ट्रिय भेला स्थगित नभएको स्पष्ट पारेको छ।
भेला स्थगित भएको भन्दै आयोजक समितिका संयोजक डा. शशांक कोइरालाको नाममा जारी भएको भनिएको विज्ञप्ति सामाजिक सञ्जालमा भाइरल भएपछि मूल आयोजक समितिले त्यसको खण्डन गर्दै निर्धारित मितिमै भेला हुने जनाएको हो।
राष्ट्रिय भेला मूल आयोजक समितिका प्रचार विभाग प्रमुख मीन विश्वकर्माले भेला साउन २९ देखि ३१ गतेसम्म काठमाडौंमा हुने निश्चित भइसकेकाले भ्रममा नपर्न आग्रह गरेका छन्। उनका अनुसार कांग्रेसभित्र विकसित पछिल्लो राजनीतिक परिस्थितिबाट हतास भएका समूहले भेला स्थगित भएको भ्रम फैलाएका हुन्।
विश्वकर्माले प्रा.डा. शशांक कोइरालाको नेतृत्व, शीर्ष नेताहरूको समर्थन, निवर्तमान सभापति शेरबहादुर देउवाको स्वदेश आगमन तथा भेलालाई सम्बोधन गर्ने तयारी र अदालतबाट मुद्दा पुनरावलोकन गर्ने आदेशसमेत आइसकेपछि केही समूह डराएको दाबी गरे।
संयोजक कोइरालाको किर्ते हस्ताक्षर प्रयोग गरी तथाकथित विज्ञप्ति जारी गरिएको भन्दै विश्वकर्माले आपत्तिसमेत जनाएका छन्। उनले भेलाको तयारी तीव्र गतिमा अघि बढिरहेको र कुनै पनि हालतमा कार्यक्रम नरोकिने बताए।
भेलाको तयारीस्वरूप व्यवस्थापकीय तथा प्रचारसम्बन्धी कामहरू भइरहेको आयोजकले जनाएको छ। संयोजक कोइरालाले विभिन्न क्षेत्रीय सभापतिसहित पार्टीका विभिन्न तहमा रहेका नेता तथा कार्यकर्तालाई भेलामा सहभागी हुन निमन्त्रणासमेत गरिसकेका छन्।
आयोजकका अनुसार भेलालाई कांग्रेसका निवर्तमान सभापति शेरबहादुर देउवा, नेता शेखर कोइराला, संयोजक डा. शशांक कोइराला, कृष्णप्रसाद सिटौला, प्रकाशमान सिंह, विमलेन्द्र निधिलगायतका शीर्ष नेताहरूले सम्बोधन गर्ने कार्यक्रम छ।








Discussion about this post