लोकतन्त्र बचाउने एक मात्र बाटो

सार्थक ब्यूरो । लोकतन्त्रलाई स्थायी, सुदृढ र जनमुखी बनाउन राजनीतिक दलहरूको भूमिका अनिवार्य हुन्छ। दलहरूलाई लोकतन्त्रका विद्यालय भनिन्छ, किनकि यिनै दलहरू लोकतान्त्रिक मूल्य, आचरण र संस्कार सिकाउने प्रमुख संस्थाहरू हुन्। तर आज दलहरूभित्र देखिएको अनुशासनहीनता, विचारशून्यता र इमानदारीको अभावले जनताको विश्वास खस्कँदै गएको छ।दलहरू जनताको सेवा गर्न होइन, सत्ता कब्जा गर्न मात्र तत्तपर देखिनु लोकतन्त्रको लागि गम्भीर सङ्केत हो। जनताको आवाज सुन्नु, कार्यकर्तासँग छलफल र विचार विमर्श गर्नु, नीति–सिद्धान्तको पालना गर्नु र पारदर्शिता कायम गर्नु राजनीतिक दलहरूको आधारभूत दायित्व हो। तर पछिल्ला वर्षहरूमा यिनै दायित्वहरू उपेक्षित छन्। दलहरूभित्र अनुशासनको साटो गुटबन्दी, विचारको साटो अवसरवाद, र इमानदारीको साटो भ्रष्टाचार हावी हुँदै गएको छ। जब लोकतन्त्रका विद्यालयमै अनुशासन, विचार र इमानदारी हराउँछन्, तब लोकतन्त्रको भविष्य अन्धकारमय हुन्छ। नेता–कार्यकर्ता सम्बन्ध आदेश–पालनामा सीमित हुँदै गएका छन्, जनताको सरोकार केवल भाषणमा सीमित छ, र निर्णय प्रक्रियामा बिचौलिया र दलालहरूको प्रभाव बढ्दै गएको छ। यस्तो अवस्थामा दलहरू जनताको प्रतिनिधि होइन, सत्ताको व्यापारी जस्ता देखिन थालेका छन्।

यसैले अब दलहरूले गहिरो आत्मसमीक्षा गर्नुपर्छ। सत्ता केन्द्रित राजनीति त्यागेर सेवा केन्द्रित राजनीति अंगिकार गर्नु अपरिहार्य भएको छ। दलहरूले बुझ्नुपर्छ—सत्ता प्राप्ति अन्तिम लक्ष्य होइन, जनसेवा र मुलुकको विकास नै आफ्नो उद्देश्य हो। जब दलहरूले सिद्धान्तलाई पुनर्जीवित गर्छन्, पारदर्शिता, जवाफदेहिता र इमानदारीलाई आफ्नो मूल मूल्य बनाउँछन्, तब मात्र जनविश्वास पुनः प्राप्त गर्न सक्छन्।

लोकतन्त्रको दिगो स्थायित्व जनताको विश्वासमा टेकेको हुन्छ। जनताको विश्वास बिना लोकतन्त्र केवल खोक्रो स्वरूपमा सीमित हुन्छ। त्यसैले अबको आवश्यकता सत्ताको होड होइन, सिद्धान्तको पुनर्जागरण हो—जसले मात्र दलहरूलाई पुनः जनताको मन जित्न र लोकतन्त्रलाई उज्यालो भविष्यतर्फ अघि बढाउन सक्षम बनाउँछ।

यो मार्ग कठिन अवश्य छ, तर यही एक मात्र बाटो हो जसले निराशा र आक्रोशको अँध्यारोलाई चिर्दै लोकतन्त्रलाई जनताको पक्षमा उभ्याउन सक्छ। लोकतन्त्रको उज्यालो भविष्य निर्माण गर्न दलहरूले अब सेवा, पारदर्शिता र इमानदारीलाई आफ्नो नयाँ पहिचान बनाउनु अनिवार्य छ।