सार्थक ब्यूरो ।कैलाली जिल्लाका तीन पालिकामा रहेका ६८ जना अपाङ्गता भएका व्यक्तिलाई विभिन्न सहयोग सामग्री हस्तान्तरण गरिएको छ । यो पहलले विशेषगरी विद्यार्थीहरूलाई शिक्षामा सहज पहुँच बनाउन मद्दत पुर्याउने बताइएको छ ।
वितरण कार्यक्रममा लम्कीचुहा नगरपालिकामा १८ जनालाई २४ थान, जानकी गाउँपालिकामा २६ जनालाई ३९ थान र टीकापुर नगरपालिकामा २४ जनालाई २९ थान गरी जम्मा ९२ थान सामग्री उपलब्ध गराइएका हुन् । वितरण गरिएका सामग्रीमा ह्विलचियर, कर्सी, ट्वाइलेट चियर, कृत्रिम खुट्टा, कृत्रिम औला लगायत १६ प्रकारका सहयोगी सामग्री रहेका छन् । यी सामग्रीको लागत रु. १३ लाख ५१ हजार ८४० पुगेको छ ।
गुडनेवर्स इन्टरनेशनल नेपालले आर्थिक तथा प्राविधिक सहयोग उपलब्ध गराएको यो कार्यक्रम सेवक नेपाल कैलालीसँगको साझेदारीमा, साथै तीनवटै पालिकाको समन्वयमा सञ्चालन गरिएको हो ।
जानकी गाउँपालिकाका अध्यक्ष गणेश चौधरीले पालिकाभित्रका अपाङ्गता भएका नागरिकको पहिचान र परिचयपत्र वितरण प्रक्रिया सुरु गर्न प्रत्येक महिना विशेषज्ञ चिकित्सकमार्फत स्वास्थ्य परीक्षण गरिने जानकारी दिनुभयो । उहाँले अपाङ्गता भएका व्यक्तिको जीवन सहज बनाउन पालिका प्रतिबद्ध रहेको पनि बताउनुभयो ।
सहयोग सामग्री पाएपछि बालबालिका तथा अभिभावकहरू खुसी देखिएका थिए । जानकी–७ का रामु थारूले कृत्रिम खुट्टा पाएपछि हिँडडुल सहज भएको अनुभव सुनाउँदै चार वर्ष अघि मजदुरी गर्दै गर्दा दुर्घटनामा खुट्टा गुमाएको स्मरण गर्नुभयो ।








Discussion about this post