कञ्चनपुर–३ विकासको अनुभव र राजनीतिक विश्वासको परीक्षा

सार्थक ब्यूरो ।आगामी प्रतिनिधिसभा निर्वाचन नजिकिँदै गर्दा कञ्चनपुर क्षेत्र नम्बर ३ पुनः राजनीतिक बहसको केन्द्रमा आएको छ। यस क्षेत्रलाई पछिल्ला वर्षहरूमा विकास र नीतिगत हस्तक्षेपका दृष्टिले अलग्गै पहिचान दिलाउने नेताका रूपमा एमाले उम्मेदवार डा. दीपक प्रकाश भट्टलाई हेरिएको छ। २०७४ को निर्वाचनपछि उनले निर्वाचित सांसदको हैसियतमा देखाएको सक्रियता र परिणाममुखी कामले यस क्षेत्रको राजनीतिक समीकरणलाई अझ रोचक बनाएको छ।
डा. भट्टको कार्यकालमा मझगाउँ विमानस्थल, महाकाली कोरिडोरको ब्रह्मदेव–कौवानी खण्ड, दोधारा–चाँदनी सुक्खा बन्दरगाह, महाकाली प्रादेशिक अस्पतालको सुधार र गेटामा मेडिकल विश्वविद्यालय स्थापना जस्ता दीर्घकालीन महत्वका परियोजनाले गति लिएका छन्। यी परियोजनाहरू केवल पूर्वाधार विकासमा सीमित छैनन्, यसले कञ्चनपुरको आर्थिक, स्वास्थ्य र रणनीतिक हैसियतलाई समेत नयाँ उचाइमा पुर्‍याउने आधार तयार गरेको छ।
राजनीतिक रूपमा पनि डा. भट्टको यात्रा अर्थपूर्ण मानिन्छ। २०७४ मा नेपाली कांग्रेसका प्रभावशाली नेता तथा पूर्व गृहमन्त्री रमेश लेखकलाई पराजित गर्दै संसद् प्रवेश गरेका उनी त्यसपछि कञ्चनपुर–३ मा बलियो नेताका रूपमा स्थापित भए। यो जित केवल व्यक्तिको विजय थिएन, यसले मतदाताले ‘परम्परागत शक्तिभन्दा काम गर्ने प्रतिनिधि’ रोजेको सन्देश दिएको थियो।
एमालेभित्र पार्टी पदको हिसाबले शीर्ष तहमा नदेखिए पनि उनी बौद्धिक, इमान्दार र स्वच्छ छविका नेताका रूपमा चिनिन्छन्। यही कारण पार्टीभित्रबाट समेत उनको उम्मेदवारी एकल रूपमा सिफारिस हुनु राजनीतिक रूपमा महत्वपूर्ण संकेत हो। यसले पार्टी संगठनभन्दा बाहिर आम जनतामा उनको स्वीकार्यता कति बलियो छ भन्ने देखाउँछ।
सुरक्षा र अन्तर्राष्ट्रिय सम्बन्धमा विद्यावारिधि गरेका डा. भट्ट विद्यार्थी जीवनदेखि नै राजनीतिमा सक्रिय रहँदै आएका हुन्। उनको शैक्षिक पृष्ठभूमि र नीति बुझाइले संसदमा प्रस्तुत गरेका विषयहरूलाई गहिराइ र तर्कशीलता दिएको समर्थकहरूको दाबी छ। अहिले उनी चुनावी भेटघाट र जनसम्पर्कमा सक्रिय देखिनु भनेको पुनः जनविश्वासको परीक्षणका लागि तयार भएको संकेत हो।
तर, निर्वाचन केवल विगतका कामको मूल्याङ्कन मात्र होइन, भविष्यप्रतिको अपेक्षाको मत पनि हो। मतदाताले अब ठूला परियोजनाको घोषणा मात्र होइन, तिनको कार्यान्वयन, पारदर्शिता र स्थानीय जीवनमा परेको प्रत्यक्ष प्रभावलाई आधार बनाएर निर्णय गर्ने अवस्था छ।
कञ्चनपुर–३ मा डा. दीपक प्रकाश भट्टलाई बलियो उम्मेदवार मानिनुका कारण स्पष्ट छन्—विकासको अनुभव, राजनीतिक विश्वसनीयता र नीतिगत समझ। तर अन्तिम फैसला जनताकै हातमा छ। यही कारण यो निर्वाचन विकासको निरन्तरता र राजनीतिक विश्वासको पुनःपुष्टिको महत्वपूर्ण परीक्षा बनेको छ।