प्रतिनिधिसभा निर्वाचन : छमध्ये एउटा कागजातको सक्कलप्रतिले मतदान गर्न पाइने

सार्थक व्युरो ।प्रतिनिधिसभा सदस्यका लागि बिहीबार हुन लागेको निर्वाचनमा मतदाताले अनिवार्य रूपमा तोकिएका कागजातमध्ये कुनै एकको सक्कल प्रति साथमा लिएर मात्र मतदान केन्द्र प्रवेश गर्न पाउने भएका छन् ।
निर्वाचन आयोगले जारी गरेको सूचनाअनुसार मतदाता परिचयपत्र भएमा त्यसकै आधारमा मतदान गर्न सकिनेछ । यदि मतदाता परिचयपत्र उपलब्ध नभए अन्य वैकल्पिक कागजात प्रयोग गर्न सकिने व्यवस्था गरिएको छ ।
आयोगका सहायक प्रवक्ता कुलबहादुर जिसीका अनुसार मतदाता परिचयपत्र नभए नेपाली नागरिकताको सक्कल प्रति, नागरिकता नभए सवारी चालक अनुमतिपत्र, त्यो पनि नभए राहदानी, राहदानी नभए राष्ट्रिय परिचयपत्र र तीमध्ये कुनै पनि नभए जग्गाधनी प्रमाण पुर्जाको सक्कल प्रति लिएर मतदान केन्द्र जान सकिनेछ । तोकिएका यी छ प्रकारका कागजातमध्ये कुनै एक अनिवार्य रूपमा साथमा भए मतदान प्रक्रिया पूरा गर्न पाइने स्पष्ट गरिएको छ ।
भोलि सम्पन्न हुने प्रतिनिधिसभा सदस्य निर्वाचनका लागि देशभर १० हजार ९६७ मतदानस्थलमा २३ हजार ११२ मतदान केन्द्र तोकिएका छन् । साथै १४३ अस्थायी मतदानस्थलसमेत व्यवस्था गरिएको छ । यी केन्द्रमार्फत एक करोड ८९ लाख तीन हजार ६८९ मतदाताले आफ्नो मताधिकार प्रयोग गर्ने आयोगले जनाएको छ ।