टिकापुर पार्कमा उच्च पर्यटक ,एकै दिन राजस्वमा नयाँ कीर्तिमान

सार्थक व्युरो ।कैलालीको टिकापुरस्थित पार्कमा नयाँ वर्षको पहिलो दिन पर्यटकको उल्लेखनीय भीड देखिँदा राजस्व संकलनले नयाँ रेकर्ड कायम गरेको छ। सो दिन १४ हजार ८ सयभन्दा बढी पर्यटकले पार्क अवलोकन गरेका थिए भने प्रवेश शुल्कबाट करिब ७ लाख ७० हजार रुपैयाँ आम्दानी भएको जनाइएको छ।
टिकापुर नगरपालिकाको पार्क व्यवस्थापन शाखाका अनुसार अघिल्लो वर्षको सोही दिनको तुलनामा यस वर्ष पर्यटक आगमन र राजस्व दुवैमा उल्लेख्य वृद्धि भएको हो। गत वर्ष वैशाख १ गते झण्डै ५ लाख रुपैयाँ राजस्व उठेकोमा यसपटक सो आँकडा निकै माथि पुगेको छ।
अत्यधिक भीडका कारण दिउँसोपछि पार्क क्षेत्रतर्फ जाने सडकमा सवारी चाप बढेर आवागमन प्रभावित भएको थियो। स्थानीय बासिन्दाका अनुसार विशेषगरी रानी कुला क्षेत्रमा रहेको साँघुरो पुलका कारण लामो समयसम्म जाम भएको र केही पर्यटक पार्क प्रवेश नै नगरी फर्किनु परेको अवस्था देखिएको थियो।
नगरपालिकाको राजस्व शाखाले दिएको जानकारी अनुसार पार्कबाट संकलित आम्दानी पछिल्ला वर्षहरूमा निरन्तर बढ्दो क्रममा छ। आर्थिक वर्ष २०८०/८१ मा ६४ लाख रुपैयाँ संकलन भएकोमा २०८१/८२ मा यो बढेर ९३ लाख ४४ हजार रुपैयाँ पुगेको थियो। चालु आर्थिक वर्षको नौ महिनामै भने १ करोड ८ लाख रुपैयाँ राजस्व उठिसकेको छ।
प्रवेश शुल्क प्रतिव्यक्ति ५० रुपैयाँ रहेको यस पार्कले प्राकृतिक सौन्दर्य, ऐतिहासिक महत्व र कर्णाली नदीमा हुने जलविहार जस्ता गतिविधिका कारण पर्यटक आकर्षित गर्दै आएको छ।
नगरपालिकाले पार्कको थप विकासका लागि करिब १४ करोड रुपैयाँको विस्तृत परियोजना प्रतिवेदन (डीपीआर) तयार गरी संघीय सरकारसँग बजेट माग गरेको जनाएको छ। प्रस्तावित योजनामा पार्किङ स्थल विस्तार, बाल उद्यान निर्माण तथा पुराना संरचनाको मर्मतसम्भार समावेश छन्।
ऐतिहासिक रूपमा पनि यो क्षेत्र महत्वपूर्ण मानिन्छ। तत्कालीन राजा महेन्द्र शिकारका क्रममा सुदूरपश्चिम पुगेका बेला विसं २०२४ चैत २४ मा स्वास्थ्य समस्या आएपछि टिकापुरमा अवतरण गरी केही समय यहीँ विश्राम गर्नुभएको थियो। त्यसपछि सो क्षेत्रलाई पार्कका रूपमा विकास गर्ने पहल सुरु भएको मानिन्छ। हाल पार्कभित्र महेन्द्र आरोग्य गृह, वीरेन्द्र विश्राम वाटिका लगायत संरचना र विभिन्न प्रजातिका गुलाब बगैँचा रहेका छन्, जसले यहाँको आकर्षण थप बढाएको छ।