सार्थक व्युरो । मधेश प्रदेश सरकारको नयाँ सत्ता समीकरण बनेसँगै मुख्यमन्त्री कृष्णप्रसाद यादवले आज प्रदेशसभाबाट विश्वासको मत लिने हुनुभएको छ। एमाले सरकारमा सहभागी भएपछि मुख्यमन्त्री यादवले पुनः बहुमत प्रमाणित गर्न प्रदेशसभामा विश्वासको मत लिन लाग्नुभएको हो।
नयाँ राजनीतिक सहमतिअनुसार नेपाल कम्युनिष्ट पार्टी (एमाले), नेपाली कांग्रेस र नेपाल कम्युनिष्ट पार्टीबीच सहकार्य बनेपछि मधेश प्रदेशको सत्ता समीकरण परिवर्तन भएको छ। यही सहमतिपछि सरकारमा एमालेको प्रवेशसँगै विश्वासको मत लिने प्रक्रिया अघि बढाइएको हो।
विश्वासको मतसम्बन्धी प्रस्तावमाथि छलफल र मतदानका लागि आज दिउँसो १ बजे प्रदेशसभा बैठक आह्वान गरिएको छ।
यसअघि वैशाख २२ गते जनमत पार्टीले सरकारलाई दिएको समर्थन फिर्ता लिएपछि मुख्यमन्त्री यादव नेतृत्वको सरकार अल्पमतमा परेको थियो। त्यसपछि जेठ १ गते विश्वासको मत लिन प्रयास गरिए पनि आवश्यक समर्थन नपुग्दा प्रक्रिया सफल हुन सकेको थिएन।
त्यतिबेला नेपाली कांग्रेसभित्रै मत विभाजन हुन सक्ने सम्भावनाले सरकार थप दबाबमा परेको बताइएको थियो। त्यसकै कारण सत्ता गठबन्धनले विश्वासको मतको प्रक्रिया सावधानीपूर्वक अघि बढाएको थियो।
हाल प्रदेशसभामा कांग्रेस, एमाले र नेकपाको नयाँ गठबन्धन बनेपछि सरकारलाई सहज बहुमत पुग्ने आकलन गरिएको छ। यसअघि सरकारलाई जसपा नेपाल, नेकपा र कांग्रेसको समर्थन रहेको थियो।
मधेश प्रदेशसभामा अहिले कुल १०२ सदस्य कायम छन्। कांग्रेसका २२, एमालेका २४, जसपा नेपालका २६, जनमत पार्टीका १२ तथा नेकपाका १५ सांसद रहेका छन्। यस्तै नागरिक उन्मुक्ति पार्टी, नेपाल संघीय समाजवादी पार्टी र राष्ट्रिय प्रजातन्त्र पार्टीका एक–एक सांसद छन्।
पूर्वसभामुखसहित केही सांसद पद रिक्त तथा दुई सांसद निलम्बनमा रहेकाले प्रदेशसभाको सदस्य संख्या घटेको हो। सभामुख रामअशिष यादव मतदानमा सहभागी नहुने भएकाले बहुमत गणनामा उहाँको मत समावेश हुने छैन।








Discussion about this post