रास्वपा सुदूरपश्चिमको नेतृत्वमा प्रकाश विष्ट चयन

सार्थक ब्यूरो । राष्ट्रिय स्वतन्त्र पार्टी (रास्वपा) सुदूरपश्चिम प्रदेशको पहिलो प्रदेश महाधिवेशनबाट इन्जिनियर प्रकाश विष्ट प्रदेश सभापतिमा निर्वाचित भएका छन्।
धनगढीस्थित रिद्धिसिद्धि पार्टी प्यालेसमा सम्पन्न निर्वाचनको अन्तिम मतपरिणामअनुसार विष्टले ३५८ मत प्राप्त गर्दै विजयी भएका हुन्। उनका प्रतिस्पर्धी जनकसिंह धामीले १५४ मत प्राप्त गरे। विष्टले २०४ मतको स्पष्ट अग्रतासहित प्रदेश नेतृत्व आफ्नो पक्षमा पारेका छन्।
प्रदेश सभापति पदका लागि भएको प्रत्यक्ष प्रतिस्पर्धामा महाधिवेशन प्रतिनिधिहरूको उल्लेखनीय समर्थन प्राप्त गर्दै विष्टले सहज जित हासिल गरेका हुन्। यससँगै उनले सुदूरपश्चिम प्रदेशमा पार्टीको नेतृत्व सम्हाल्ने जिम्मेवारी पाएका छन्।
नवनिर्वाचित सभापति विष्टको नेतृत्वलाई प्रदेशमा पार्टी संगठन विस्तार र सुदृढीकरणका लागि महत्वपूर्ण अवसरका रूपमा हेरिएको छ। निर्वाचन समितिका अनुसार प्रदेश कार्यसमितिका अन्य पदहरूको मतगणना भने जारी रहेको छ।
रास्वपाको पहिलो सुदूरपश्चिम प्रदेश महाधिवेशनबाट नयाँ नेतृत्व चयन भएसँगै प्रदेशभर संगठन सशक्त बनाउने, जनस्तरसम्म पार्टीको पहुँच विस्तार गर्ने तथा आगामी राजनीतिक गतिविधिलाई प्रभावकारी ढंगले अघि बढाउने अपेक्षा गरिएको छ।