सार्थक ब्यूरो । कञ्चनपुरमा पछिल्ला चार आर्थिक वर्षको अवधिमा भएका सवारी दुर्घटनामा १५४ जनाको मृत्यु भएको छ । दुर्घटनामा परी एक हजार ७८४ जना घाइते भएको जिल्ला ट्राफिक प्रहरी कार्यालयको तथ्यांकले देखाएको छ ।
आर्थिक वर्ष २०७९/८० देखि हालसम्म जिल्लामा सवारी दुर्घटनाको संख्या उल्लेख्य रहेको जिल्ला ट्राफिक प्रहरी कार्यालयले जनाएको छ । ट्राफिक प्रहरीका अनुसार पूर्व–पश्चिम राजमार्गमा दुर्घटनाको जोखिम तुलनात्मक रूपमा बढी देखिएको छ ।
जिल्ला ट्राफिक प्रहरी कार्यालयका प्रमुख प्रहरी निरीक्षक बलेन्द्र नाथले तीव्र गति दुर्घटनाको प्रमुख कारणमध्ये एक रहेको बताए । सवारी चालकलाई ट्राफिक नियम पालना गर्न आग्रह गर्दै उनले नियमित रूपमा सडक जाँचसँगै ट्राफिक सचेतना कार्यक्रम सञ्चालन भइरहेको जानकारी दिए ।
उनका अनुसार ठूला सवारीसाधनको तुलनामा मोटरसाइकल र स्कुटरजस्ता दुईपाङ्ग्रे सवारी दुर्घटनामा मानवीय क्षति बढी हुने गरेको छ । पछिल्लो समय सडक जाँचलाई कडाइ गरेपछि मादक पदार्थ सेवन गरी सवारी चलाउनेको संख्या घटेको प्रहरी निरीक्षक नाथले बताए ।
उनले बजार क्षेत्रदेखि राजमार्गका विभिन्न स्थानमा नियमित जाँच हुने गरेको बताए । राति अबेरसम्म समेत सडक जाँच सञ्चालन गरिँदै आएको उनको भनाइ छ ।
ट्राफिक प्रहरीको विवरणअनुसार आर्थिक वर्ष २०७९/८० मा जिल्लामा भएका सवारी दुर्घटनामा ४३ जनाको मृत्यु भएको थियो भने ५९ जना घाइते भएका थिए । आर्थिक वर्ष २०८०/८१ मा ३२ जनाको मृत्यु र ७४ जना घाइते भएका थिए ।
त्यस्तै, आर्थिक वर्ष २०८१/८२ मा दुर्घटनामा ३८ जनाले ज्यान गुमाएका थिए भने ७७३ जना घाइते भएका थिए । आर्थिक वर्ष २०८२/८३ मा मात्रै कञ्चनपुरमा ५६४ वटा सवारी दुर्घटना भएको प्रहरी निरीक्षक नाथले जानकारी दिए । उक्त अवधिमा दुर्घटनामा परी ४१ जनाको मृत्यु र ८७८ जना घाइते भएका थिए ।
ट्राफिक नियम उल्लङ्घन गर्ने सवारी तथा चालकविरुद्ध पनि प्रहरीले कारबाही गर्दै आएको छ । पछिल्ला तीन आर्थिक वर्षमा कञ्चनपुरमा ३५ हजार ८६१ सवारीसाधन तथा चालकलाई ट्राफिक नियम उल्लङ्घन गरेको भन्दै कारबाही गरिएको जिल्ला ट्राफिक प्रहरीले जनाएको छ ।
आर्थिक वर्ष २०८२/८३ मा मात्रै ट्राफिक नियम उल्लङ्घन गर्नेहरूबाट ५९ लाख १४ हजार ५०० रुपैयाँ राजस्व संकलन भएको प्रहरीको तथ्यांक छ ।








Discussion about this post