भिमदत्त नगरपालिकाको निर्देशनविरुद्ध अस्थायी शिक्षकहरूको अल्टिमेटम

सार्थक ब्यूरो । भिमदत्त नगरपालिकाका सामुदायिक विद्यालयहरूमा कार्यरत अस्थायी शिक्षकहरू नगरपालिकाले जारी गरेको निर्देशनको विरोधमा उत्रिएका छन्।
नगरपालिकाले करार शिक्षक, राहत शिक्षक तथा बालविकास शिक्षकहरूको सेवा सम्झौता नविकरण गर्न साउन ५ गते निर्देशन दिएको थियो। सो निर्देशन शिक्षा ऐन तथा नियमावलीअनुसार भए पनि अस्थायी शिक्षकहरू र पेशागत संगठनहरूले यसलाई मनपरी ढंगले गरिएको भन्दै विरोध जनाएका छन्।
बुधबार शिक्षकहरू नगरपालिका कार्यालय पुगेका थिए। उनीहरूले शिक्षा शाखा प्रमुख हरिदत्त जोशी र शिक्षा विकास तथा समन्वय इकाइलाई ज्ञापनपत्र बुझाउँदै उक्त निर्देशन तुरुन्त खारेज गर्न माग गरे।
शिक्षकहरूले नगरपालिकाको निर्देशनले आफूहरूको पेशागत अस्थायित्व झन् बलियो बनाउने भन्दै चिन्ता व्यक्त गरेका छन्। उनीहरूका अनुसार स्वीकृत दरबन्दीमा कार्यरत अस्थायी, राहत तथा बालविकास शिक्षकहरूको सेवा निरन्तरता सुनिश्चित नहुनु गैरन्यायिक र अमानवीय हो।
नेपाल शिक्षक महासंघसहित विभिन्न पेशागत शिक्षक संगठनहरूले समेत सेवा करारका नाममा अन्याय गरिए ठूलो आन्दोलनमा उत्रिने चेतावनी दिएका छन्।
प्रदर्शनको क्रममा आक्रोशित शिक्षकहरूले नगरपालिकाद्वारा टाँस गरिएको निर्देशन च्यातेका थिए।