सार्थक ब्यूरो । सुदूरपश्चिम प्रदेश सरकारले आगामी मङ्सिर पहिलो साता आयोजना गर्ने भनिएको प्रदेश लगानी तथा विकास सम्मेलन अनिश्चित बन्दै गएको छ । जेन–जेड आन्दोलनका क्रममा प्रदेश राजधानीमा सरकारी संरचना ध्वस्त भएपछि सम्मेलन गर्ने वातावरण कमजोर बनेको हो ।
प्रदेश सरकारले गत वर्ष नै मङ्सिर १ र २ गते सम्मेलन गर्ने निर्णय गरी तयारीलाई गति दिएको थियो । प्रदेशको समृद्धिका लागि स्वदेशी तथा विदेशी लगानी भित्र्याउने लक्ष्यसहित विगत तीन वर्षदेखि तयारी गरिँदै आएको सम्मेलन अब रोकिने almost निश्चित देखिएको छ ।
आर्थिक मामिला राज्यमन्त्री प्रकाशबहादुर बमका अनुसार, पछिल्लो परिस्थितिले सम्मेलन गर्न सम्भव छैन । “विध्वंसपश्चात विदेशी लगानीकर्ता आउने विश्वास गर्न सकिन्न,” उनले भने, “यस्तो अवस्थामा सम्मेलन गरेर पनि परिणाम आउने देखिन्न ।”
लगानीमैत्री वातावरण बनाउन कानुनी परिमार्जनदेखि प्रिसम्मेलनसम्मका गतिविधि पूरा गरिए पनि हालको अस्थिरताले योजना खतरामा परेको छ । नीति तथा कानुन परिमार्जन सिफारिस उपसमितिका संयोजक डा. ताराप्रसाद जोशीले समेत विदेशी लगानीकर्ताले यस्तो अवस्थामा नेपालप्रति चासो नदेखाउने सम्भावना ठुलो रहेको बताए ।
गत जेठ २१ गते धनगढीमा प्रिसम्मेलन सम्पन्न गरी प्रदेश सरकारले नौवटा प्राथमिक क्षेत्र पहिचान गरेको थियो । तर, आन्दोलनपश्चात मुख्यमन्त्री तथा मन्त्रीपरिषद् कार्यालय, प्रदेश सभा र विभिन्न मन्त्रालयमा आगजनी र तोडफोड भएपछि तत्कालीन कानुनी प्रक्रियासमेत रोकिएको छ ।
सभामुख भीमबहादुर भण्डारीका अनुसार, “प्रदेश सभा ९० प्रतिशत क्षतिग्रस्त छ, पुनर्निर्माणबिना बैठक सञ्चालन असम्भव छ ।” यस कारण कानुन निर्माण वा संशोधन गर्नुपर्ने कार्यसमेत अनिश्चित बनेको छ ।
लगानी सम्मेलनमार्फत सुदूरपश्चिमको सम्भावना उजागर गर्ने प्रदेश सरकारको प्रयास हाललाई स्थगित हुने संकेत प्रष्ट भएको छ ।







Discussion about this post