सार्थक ब्यूरो।देशभर विजयादशमीको तयारी चुलिँदै गर्दा सुदूरपश्चिममा भने दशैँसँगै देवपूजनको विशेष उत्सव सुरु भएको छ। धार्मिक आस्था र सांस्कृतिक परम्परा मिसिएको यस पर्वलाई यहाँका स्थानीयवासीले विशेष महत्वका साथ मनाउने गर्छन्।
नवरात्रको पहिलो दिन घटस्थापना गरेर राखिएको जमरा दशमीको दिन काटी मान्यजनको हातबाट टीका–आशीर्वाद ग्रहण गर्ने परम्परा छ। ढाकाटोपीमा जमरा सिउरेर, महिलाले चुल्ठोमा जमरा सजाएर पारिवारिक मिलनको खुसियाली बाँड्ने चलन अझै जीवित छ।
सुदूरपश्चिममा गौरामा बिरुडा, दशैंमा जमरा र तिहारमा चिउराको विशेष महत्त्व छ। यी तीनै तत्वलाई धार्मिक–सांस्कृतिक प्रतीकका रूपमा पूजाआजामा प्रयोग गरिन्छ। ज्योतिष र आयुर्वेदका दृष्टिले समेत जमरा पोषक र स्वास्थ्यवर्धक मानिन्छ।
नवरात्रभर शक्तिपीठ र देवी–देवताको मन्दिरमा पूजाआजा, मेला र जात्रा लाग्ने गर्छ। विशेषगरी महाअष्टमी, महानवमी र विजया दशमीका दिन बैतडी, डोटी र अछामलगायतका शक्तिपीठहरूमा ठूलो मेला लाग्छ। इष्ट–कुलदेवताप्रति चढौनी र स्याका साथ देवपूजन गर्ने परम्परा पनि यसै अवधिमा सुरु हुन्छ।
दशैँलाई पारिवारिक मिलन र सांस्कृतिक एकताको पर्वका रूपमा लिइने भए पनि सुदूरपश्चिममा यसलाई देवपूजन र सामूहिक आस्थासँग जोडिएको धार्मिक–सांस्कृतिक महोत्सवका रूपमा पनि मनाइन्छ।








Discussion about this post