कांग्रेसभित्र चर्किंदै आन्तरिक विवाद,उम्मेदवार छनोटमा थापाको असहमति

सार्थक ब्यूरो ।नेपाली कांग्रेस पार्टीभित्रको आन्तरिक विवाद पछिल्लो समय तीव्र बन्दै गएको छ। विशेष महाधिवेशनको मागसँगै सतहमा आएको शक्ति संघर्ष राष्ट्रिय सभा सदस्यको उम्मेदवार छनोट प्रक्रियामा महामन्त्री गगनकुमार थापाको सार्वजनिक असहमतिको रूपमा प्रकट भएको छ। नेतृत्वको निर्णय शैलीप्रति असन्तुष्टि जनाउँदै थापाले कडा प्रतिक्रिया दिएपछि कांग्रेस औपचारिक विभाजनको मोडतर्फ उन्मुख भएको संकेत देखिएको छ।
बुधबार पार्टी केन्द्रीय कार्यालय सानेपामा सञ्चारकर्मीहरूसँग कुरा गर्दै महामन्त्री थापाले कांग्रेस–एमालेबीच भएको राष्ट्रिय सभा निर्वाचनको तालमेल पार्टीको नीति, सिद्धान्त र दीर्घकालीन हितभन्दा पनि सीमित नेताहरूको स्वार्थ केन्द्रित रहेको आरोप लगाए। उनका अनुसार यो सहकार्यले पार्टीको संस्थागत निर्णय प्रक्रिया कमजोर बनाउनुका साथै तल्लो तहका कार्यकर्ताको सम्मान र सहभागितामाथि प्रश्न उठाएको छ।
थापाले कांग्रेसले अघि सारेका ९ जना उम्मेदवारमध्ये तीन जनाको नाम कुनै पनि जिल्ला, क्षेत्रीय वा प्रदेश समितिबाट सिफारिस नभएको दाबी गरे। “तल्लो तहबाट सिफारिस नै नभएका नामहरू माथिबाटै थोपारिएको अवस्था छ,” उनले भने, “यसले पार्टीको संरचना र निर्णय प्रणालीप्रति गम्भीर अवहेलना भएको देखाउँछ।”
उम्मेदवार छनोटमा समावेशिताको सिद्धान्त बेवास्ता गरिएको भन्दै थापाले असन्तुष्टि जनाए। ९ जनाको सूचीमा जनजाति समुदायको प्रतिनिधित्व नहुनु र मुस्लिम समुदायका योग्य नेताहरूलाई समेटिन नसक्नु लज्जास्पद भएको उनको टिप्पणी थियो। नेताहरूले आफ्नो निकटतालाई आधार बनाएर समुदायगत सिट बाँडफाँट गरेको आरोप पनि उनले लगाए।
एमालेसँग गरिएको तालमेलको औचित्यमाथि प्रश्न उठाउँदै थापाले पार्टीभित्र पछिल्लो समय महामन्त्रीहरूको भूमिकालाई सीमित बनाउने प्रयास भइरहेको गुनासो गरे। निर्णय प्रक्रियाबाट आफूहरूलाई अलग राखिएको भन्दै उनले उम्मेदवार छनोटको सम्पूर्ण प्रक्रियामा आफ्नो असहमति स्पष्ट पारे।
यहीबीच पार्टी नेतृत्वको निर्णयविपरीत विशेष महाधिवेशन पक्षधर समूहले पुस २७ र २८ गते काठमाडौंमा विशेष केन्द्रीय महाधिवेशन आह्वान गरिसकेको छ। विधानअनुसार आवश्यक संख्यामा प्रतिनिधिहरूको माग हुँदाहुँदै पनि नेतृत्वले महाधिवेशन टार्दै आएको आरोप समेत लाग्दै आएको छ।
राष्ट्रिय सभा निर्वाचनको पूर्वसन्ध्यामा देखिएको यो आन्तरिक उथलपुथलले कांग्रेसभित्रको संकट थप गहिरिएको संकेत गरेको छ। उम्मेदवार छनोटदेखि विशेष महाधिवेशनसम्मका विवादले पार्टीभित्र सहमतिको बाटो साँघुरिँदै गएको देखिँदा कांग्रेस आगामी दिनमा गम्भीर चुनौतीको सामना गर्न सक्ने राजनीतिक वृत्तमा चर्चा सुरु भएको छ।