शान्ति सुरक्षा र सामाजिक सद्भाव कायम राख्न :मानव अधिकार आयोगको अपिल

सार्थक ब्यूरो। देशभर भइरहेका राजनीतिक गतिविधि र प्रदर्शनका बीच राष्ट्रिय मानव अधिकार आयोगले सरकार र सबै सरोकारवालालाई शान्ति, सुरक्षा र सामाजिक सद्भाव कायम राख्न अपिल गरेको छ।
आयोगले बुधबार सार्वजनिक गरेको विज्ञप्तिमा भदौ २३ र २४ का घटनापछि उत्पन्न परिस्थितिले मुलुकमा अस्थिरता र तनाव बढाएको उल्लेख गर्दै शान्ति–सुरक्षा सुदृढ पार्न र विधिको शासनमा अडिग रहन सरकारलाई सुझाव दिएको छ। आयोगले सुरक्षा निकायलाई संयमता, धैर्य र मानव अधिकारका मापदण्डअनुसार व्यवहार गर्न निर्देशनसमेत दिएको छ।
अनुगमनका क्रममा ती घटनामा मानव अधिकार उल्लंघनका घटना फेला परेका आयोगले जनाएको छ। यस्ता घटनाले नागरिकको सुरक्षा र मौलिक अधिकारमा नकारात्मक असर पार्ने भन्दै आयोगले गम्भीर चिन्ता व्यक्त गरेको छ।
त्यसैगरी, आयोगले आगामी दिनमा हुन सक्ने प्रदर्शन र राजनीतिक गतिविधिलाई शान्तिपूर्ण, मर्यादित र संवेदनशील ढङ्गले सञ्चालन गर्न दलहरू र आन्दोलनकारी समूहहरूलाई आह्वान गरेको छ। आयोगले सामाजिक सद्भावमा आघात पुर्‍याउने घृणात्मक भाषण र उत्तेजक अभिव्यक्ति रोक्न आग्रह गर्दै राजनीतिक समाधान जनमतमा आधारित स्वच्छ प्रतिस्पर्धामार्फत खोज्न सबै पक्षलाई सुझाव दिएको छ।
आयोगको भनाइमा, “संवेदनशील अवस्थाहरूमा संयमता नै लोकतान्त्रिक मूल्यको आधार हो—सरकार र नागरिक दुबैको जिम्मेवारी हो, शान्ति र मानव अधिकारको रक्षा गर्नु।”