सार्थक व्युरो । धनगढीमा बिहीबारदेखि सन्ध्याकालीन धनगढी उत्सव–२०८३ सुरु भएको छ। स्थानीय कला, संस्कृति तथा प्रतिभाको प्रवर्द्धन गर्ने उद्देश्यसहित आयोजना गरिएको उत्सवको उद्घाटन सुदूरपश्चिम प्रदेशसभा सदस्य धर्मराज पाठक ले गरेका हुन्।
उद्घाटन समारोहलाई सम्बोधन गर्दै पाठकले यस्ता मेला तथा उत्सवहरूले स्थानीय कला, संस्कृतिको संरक्षणसँगै नयाँ प्रतिभालाई अवसर प्रदान गर्ने बताए। धनगढी उपमहानगरपालिकाको कार्यालयदेखि राष्ट्र बैंक चोकसम्मको क्षेत्रमा सञ्चालन गरिएको उत्सवको उद्घाटन कार्यक्रममा आयोजक प्रभात इभेन्ट एण्ड मिडिया प्रालिका अध्यक्ष प्रकाश छेडालको अध्यक्षता रहेको थियो।
कार्यक्रममा नेपाल पत्रकार महासंघ कैलाली शाखाका अध्यक्ष श्रवण देउवा विशिष्ट अतिथिका रूपमा सहभागी भएका थिए। उद्घाटन अवसरमा विभिन्न विद्यालयका विद्यार्थी तथा स्थानीय कलाकारहरूले सांस्कृतिक प्रस्तुति दिएका थिए, जसले दर्शकको ध्यान आकर्षित गरेको थियो।
आयोजकका अनुसार उत्सव आगामी असार ११ गतेसम्म सञ्चालन हुनेछ। गर्मी मौसमलाई मध्यनजर गर्दै कार्यक्रम हरेक दिन साँझ ५ बजेदेखि राति ९ बजेसम्म सञ्चालन गरिने जनाइएको छ।
उत्सवस्थलमा करिब ३० वटा व्यापारिक स्टल, मनोरञ्जनात्मक मेला तथा विभिन्न सांस्कृतिक कार्यक्रमको व्यवस्था गरिएको छ। उत्सव सञ्चालनका लागि करिब १५ लाख रुपैयाँ खर्च हुने अनुमान गरिएको आयोजकले जनाएको छ।
विद्यार्थीका लागि २० रुपैयाँ र अन्य सर्वसाधारणका लागि ३० रुपैयाँ प्रवेश शुल्क निर्धारण गरिएको छ। उत्सवका संयोजक तथा कार्यक्रम सञ्चालक गुणाकर पनेरुले स्थानीय भाषा, कला, संस्कृति तथा सिर्जनात्मक क्षमताको विकास र प्रवर्द्धनमा उत्सवले सकारात्मक योगदान पुर्याउने विश्वास व्यक्त गरे। कार्यक्रममा सह–सञ्चालन रेखा धानुकले गरेकी थिइन्।








Discussion about this post